21 janar 2008

Presidenti i Republikës, Bamir Topi uroi sot Rektorët e rinj të sapozgjedhur të universiteteve shqiptare gjatë një ceremonie të zhvilluar në Presidencë, ku zotërinjtë Petrit Malaj Rektor i Akademisë së Arteve, Vejsi Rizvanolli Rektor Akademisë së Edukimit Fizik dhe Sporteve “Vojo Kushi”, Fatos Harizaj Rektor i Universitetit Bujqësor të Tiranës Jorgaq Kaçani Rektor i Universitetit Politeknik të Tiranës, Dhori Kule Rektor i Universitetit të Tiranës, Liman Varoshi, Rektor i Universitetit “Aleksandër Xhuvani” të Elbasanit, Artan Haxhi Rektor i Universitetit “Luigj Gurakuqi” të Shkodrës, Gëzim Sala Rektor i Universitetit “Eqrem Çabej” të Gjirokastrës, u përshëndetën nga Kreu i Shtetit me rastin e dekretimit të tyre.

Në ceremoni morën pjesë Ministri i Arsimit dhe Shkencës, Genc Pollo, kryetari i grupit parlamentar të PD-së dhe antar i Komisionit për Edukimin dhe Mjetet e Informimit Publik Astrit Patozi, kryetarja e grupit parlamentar të PS-së dhe kryetare e Komisionit për Edukimin dhe Mjetet e Informimit Publik, Valentina Leskaj, nënkryetari i Komisionit, deputeti Gëzim Karapici, deputetët anëtarë Pëllumb Xhufi, Musa Ulqini, deputetët Bujar Leskaj e Neritan Ceka dhe ish-rektorët Veselin Paçuli, Përparim Hoxha, Shezai Rrokaj, Jani Dode, Mahir Hoti, Kristaq Kikina e Kastriot Çaushi. 

Në përshëndetjen e tij, Presidenti i Republikës, mes të tjerash është shprehur “Unë dëshiroj t’ju inkurajoj në misionin tuaj , dëshiroj gjithashtu t’ju them që pas dekretimit tuaj vjen një seri tjetër veprimesh që duhet të vijnë mbi bazën e një mendimi e një bazamenti demokratik në universitete kur të konsolidohen dhe konstituohen edhe institucionet e tjera që kanë të bëjnë qoftë me Senatin, me Këshillin e fakulteteve, me Këshillin administrativ për të krijuar një klimë sa më të mirë për studentët, të cilët për hir të së vërtetës gjatë kësaj periudhe, që është zgjatur më shumë se ç’duhet kanë përjetuar një moment jo fort të këndshëm, për të ndjekur me seriozitet pikërisht atë që është detyra e studentëve: të ndjekin studimet, të shohin një seriozitet dhe të kenë një model te pedagogët e tyre. Është momenti që ne duhet të rifitojmë atë që është humbur gjatë kësaj kohe që universitetet të futen në një punë serioze për të bërë pikërisht atë që ne kemi thenë vazhdimisht: Studenti të jetë në qendër të vëmendjes, sepse nuk do të kishte sens të quheshin pedagogë pa studentë.”